Quick Beauty Tips in Urdu

Aaj kal k masroof daur mein hum sub he bay had masroof hain. Kisi kay pass itn time nahi hota k woh ghantoon aik he kaam per laga day. Zindagi itni madroof ho chuki hai k insan k liye waqt nikalna na mumkin si baat hoti ja rahi hai.

Kisi takreeb mein jana ho, dawat ka mauqa ho ya office janay k liye khawateen ko akser o baishter aik he masla dochaar hota hai k who bohut time lagati hain. Ghantoon ki tayyari say na sirf woh ghar waloon ko pareshaan kerti hain balkay khud bhi masaail ka shikaar hoti hain. Aaj aisi he khawateen k liye hum the tehreer lay k aiye hain taa kay unki kuch madad ho sakay aur woh in beauty tips pea mal ker k na sirf apna waqt bacha sakain balkay kisi bhi qisam ki pareshaani say bhi bach sakain. Zail mein aisi he karamad aur mufeed beauty tips darj ki jati hain jo apko waqt bachany mein madad karain gi.

Quick Beauty Tips:

• Eyelashes ko curl kerna ho tou eyelash curler ko 2 ya 3 second k liye hair dryer say garam ker lain. Istemaal say pehlay daikh lain k curler ziada garam na ho jaye. Iss terha ap ki eyelashes achi terha curl ho jain gi aur waqt bhi bachay ga.
• Foundation cream mein koi bhi moisturizer mila ker laganay say jild khushk nazer nahi aati aur foundation achay tareeqay say chehray aur gardan per phial jati hai.
• Apnay baaloon ko rozana dhonay say guraiz karain. Garmi ho ya sardi. Baar baar shampoo ka istemaal nuqsaan deh sabit hota hai.
• Ager aap khoobsorat aur naram o mulaim jild ki khawahish mund hain tou paani ka istemaal ziada karain.
• Ager sard mausam mein apko phatay(chapped) hontoon ki shikayat rehti hai tou aap daant brush kertay waqt brush ko hoontoon per rager liya karain. Raat ko sonay say pehlay zaitoon ka tail laganay say bhi khasi madad milti hai.
• Ager apkay nakhun peelay hain tou nakhun saaf kernay wala brush lay ker whitening toothpaste say rager lain aur saaf ker lain.
• Akser khawateen iss baat ki shikayat kerti nazer aati hain k unka makeup bohut jaldi kharaab ho jata hai. Aisi khaawateen ko chahiye k makeup kernay say pehlay jild ko moisturize karain aur primer lagain aur phir makeup karain tou unka makeup kuch ghantoon tuk bilkul theek rahay ga.
• Lipgloss hamesha apnay pass rakhain. Peachy pink shades bohut bhalay lagtay hain aur apko fresh dikhai dainay mein madad kertay hain.
• Baaloon ko pony tail style mein baandh lain takay hair style bnanay mein waqt bachay. Khulay baaloon mein akser khawateen comfortable mehsoos nahi kerti.
• Eye makeup k liye bhi neutral shades ka intekhaab behter rehta hai. Bright aur chamakdaar shades ka intekhaab akser apki pori look ko kharaab ker daita hai. Formal functions aur shadi bayaah ki taqreebat mein dark makeup kerna munasin lagta hai. Offica janay ho ya bahar outing, shopping wagaira ka liye janay k liye light shades bhalay lagtay hain.

Inn quick beauty tips pe amal karain aur haseen nazer ain.